"தனியாக போராட முடியாதா?" ....

சமீப காலங்களில் நம்ம ஒருபால் ஈர்ப்புக்கு ஆதரவாக நடக்கும் விழிப்புணர்வு நிகழ்வுகள் அனைத்திலும், திருநங்கைகளின் பங்கு பிரதானமாக இருப்பதை அதிகம்  பார்க்க முடியுது... என்றைக்கோ, யாரோ உருவாக்கிய LGBT (Lesbian, Gay, Bisexual, Transgender) என்ற ஒருங்கிணைப்பை வைத்து, பாலின சிறுபான்மையினர் என்கிற அடிப்படையில் இந்த இணைந்த போராட்டங்கள் நடைபெறுகிறது....

இது சரியான வழியா?னு யோசிச்சதுண்டா நீங்க?... திருநங்கைகளும், ஒருபால் ஈர்ப்பாளர்களும் ஒன்றா?.... நிச்சயமா இல்லைங்க.... திருநங்கை என்பவர் “பிறப்பால ஆணாக இருந்தாலும், தன்னை பெண்ணாக உணர்ந்து, பெண்ணாகவே மாறிவிட்டவர்”... ஆனால், கே (gay) என்பவன் “தான் ஆண் தான் என்பதில் ரொம்பவே உறுதியாக இருப்பவன்.... பாலீர்ப்பு விஷயம் ஒன்றில் மட்டும் அவன் மற்ற ஆண்களிலிருந்து கொஞ்சம் மாறுபடுறான்.... மத்த ஆண்கள், பெண்கள் மீது ஈர்ப்பு கொள்ளும்போது, கே என்பவன் ஆணின் மீதே ஈர்ப்பு கொள்கிறான்..”. சுருக்கமா சொல்லனும்னா, திருநர் என்பவர் பாலின மாறுபாடு கொண்டவர், கே என்பவர் பாலீர்ப்பில் மட்டும் மாற்றம் கொண்டவர்.... அதாவது, “பாம்பு படம் எடுக்குறதுக்கும், பாலுமகேந்திரா படம் எடுப்பதற்கும்” எவ்வளவு வித்தியாசம் இருக்கோ, அந்த அளவு வித்தியாசம் “கே மற்றும் திருநங்கை” இரண்டிற்கும் உண்டு...

அதற்காக நான் திருநங்கைகளை குறைவாக மதிப்பிடுவதாக நினைக்காதிங்க.... அவங்க போராட்டம் ரொம்ப நியாயமான போராட்டம்... நம்மைவிட அதிக கஷ்டங்களை அனுபவித்து வாழ்பவங்க அவங்க... ஆனால், சமீப காலமாக அவங்க போராட்டம் நல்ல முன்னேற்றத்தை அடைந்துள்ளது.... இந்த சமூகம் அவங்கள பற்றிய நல்ல அபிப்ராயத்தை கொண்டு வந்துகொண்டிருக்குது.... “நலவாரியம் தொடங்கி வாக்குரிமை வரை” போராடி பெற்றுள்ளார்கள்... அவங்க போராட்ட வெற்றியின் உயரத்தை நாம் தொட இன்னும் பல ஆண்டுகள் ஆகும்.... அதனால, இனி அவங்களோட சேர்ந்து போராடுவதை விட, நமக்கான தனித்துவமான போராட்டங்கள் உண்டாகனும்னு நினைப்பது தவறல்ல.... இன்னும் நம்மை பற்றிய தெளிவான கண்ணோட்டம் படித்த மேதைகள் மத்தியில் கூட உருவாகல, அதற்கு காரணம் நம் தனித்துவத்தை நாமே இன்னும் சரியா வெளிப்படுத்தல....

தனியாக போராடணும்னு நான் சொல்றதுக்கு முக்கிய காரணங்கள் உண்டு....

முதல்ல, இப்படி இணைந்து போராட்டம் நடத்துவதால, “ஒருபால் ஈர்ப்பு நபர்களும் திருனர்கள்தான்” என்கிற ஒரு பொய்யான பிம்பம் மக்கள் மத்தியில் உண்டாகிடுது... ஒரு ஆண் இன்னொரு ஆண் மீது ஈர்ப்பு வைத்தாலே, அவன் திருநங்கை என்று நினைத்திடுறாங்க.... இங்கே, ஒருபால் ஈர்ப்பு என்பதற்கான ஒரு விளக்கத்தை மக்கள் மத்தியில் நாம கொண்டுசேர்க்க முடியாம போயிடுது....

பொதுமக்களுக்கு மட்டுமில்லை,படித்தவர்கள், முற்போக்கு எழுத்தாளர்கள், ஊடக துறையினர் என்று பல்துறை வல்லுனர்களுக்குமே அப்படிப்பட்ட எண்ணம்தான் மனதில் இருக்கிறது.... திருநங்கைகளுக்கு ஆதரவா பேசுற முற்போக்கு எழுத்தாளர்களும், சமூக ஆர்வலர்களும் கூட “ஒருபால் ஈர்ப்பு” என்றால் கருத்து சொல்லவே தயங்குறாங்க.... ஒருவகையில், அவங்களுக்கு இதைப்பற்றிய தனியான ஒரு ஐடியா இல்லாதது காரணமாக இருக்கலாம்...

சில வருஷங்களுக்கு முன்பு நடந்த ஒரு நிகழ்வு இப்போ எனக்கு ஞாபகம் வருது... பள்ளியில் படித்துக்கொண்டிருந்த ஒரு பதின்வயது சிறுவன், தனக்கு மற்ற ஆண்கள் மீது ஈர்ப்பு வருவதில் குழப்பத்தில் விழுந்தான்... மனரீதியாக அதிகம் பாதிக்கப்பட்டவன், ஒரு கட்டத்தில் வீட்டைவிட்டு வெளியே வந்து திருநங்கையாக மாறிட சென்றுவிட்டான்.... நல்லவேளையாக அவன் சென்ற இடத்தில் அவனுக்கு “கே” பற்றிய ஒரு விளக்கத்தை கொடுத்த நல்லவர்கள், அவனை மீண்டும் வீட்டுக்கு அனுப்பி வைத்தனர்.... இது எவ்வளவு பெரிய சமூக அலட்சியத்தை காட்டுகிறது பார்த்திங்களா?... தன்னால் உணரப்படும் மாற்றத்துக்கு என்ன பெயர்? என்று தெரியாமல் ஒரு பள்ளி மாணவன் இப்படி முடிவெடுத்து இருக்கிறான்....

இது ஒரு சிறுவனின் கதை இல்லை.... இன்னும் “கே” என்ற தனி அடையாளம் தெரியாத எத்தனையோ மாணவர்களின் கதை....

இங்கே அதிகம் விழிப்புணர்வு பெற்றோர்களுக்கு தேவைப்படுது.... இன்னொரு ஆணுடன் தொடர்பில் இருந்த என் நண்பனை பற்றி அவன் பெற்றோருக்கு தெரியவந்தபோது, அவர்கள் அவனை “பொ**, ஒ**து”போன்ற வார்த்தைகளால் திட்டி, அவனை ஒரு திருனங்கையாகவே நினைத்தனர்.... இத்தனைக்கும் அந்த அப்பா ஒரு அரசு அதிகாரி....

நாம ஊடகத்தை மட்டுமே இதற்கு காரணமாக கூறிவிட்டு, ஒதுங்கி நின்றுவிடுவதில் அர்த்தமில்லை... நமக்கான தனித்துவத்தை நாம் உணர்த்த தவறியதன் விளைவுதான் இதற்கு காரணம்.... நம் போராட்டம் தொடங்கிய நாள் முதலாக, இன்றுவரை பெரும்பாலான போராட்டங்கள் “திருநங்கை” அமைப்புகளுடன் இணைந்துதானே நடக்கிறது... வெளியிலிருந்து பார்க்கும், பொதுவான நபர்களுக்கு “இரண்டும் ஒன்றுதான்” என்றுதானே எண்ணத்தோன்றும்....

1990களில் அமெரிக்காவிலும், இன்றுவரை இந்தியாவிலும் எயிட்ஸ் நோயை “gay disease” என்று மக்கள் நம்பிய காரணம் என்ன தெரியுமா?.... கே விழிப்புணர்வையும், எயிட்ஸ் விழிப்புணர்வையும் ஒன்றாக நடத்திய அமைப்புகள்தான் காரணம்.... இரண்டு வார்த்தைகளையும் அதிகம் இணைந்தே பார்த்திருப்பதால், மக்கள் மத்தியில் கே என்றாலே, அடுத்த நினைப்பாக எயிட்ஸ் வந்துவிடுகிறது....

“பாதுகாப்பற்ற உடலுறவு” கொண்டால் எயிட்ஸ் நோய்க்கு ஆண், பெண் என்ற பேதமல்லாம் இல்லை... யாரை வேணும்னாலும் தாக்கும்.... இந்த உண்மை புரியாமல், புரிந்தும் புரியாதது போல இருக்கும் நம்ம மக்களை அப்படி கோணத்தில் எண்ண வைத்தது “விழிப்புணர்வு” போராட்டங்கள் என்கிற அம்சத்தில் நாம் நடத்திய போராட்டங்களும், நிகழ்வுகளும்தான்.... இதை எதற்காக சொல்கிறேன் என்றால், நம்மை அறியாமல் நாம் செய்யும் தவறுகள் எவ்வளவு பெரிய விளைவை ஏற்படுத்தும் என்பதை சொல்லத்தான்....

நாம் இன்னும் சில காலம் ஒருபால் ஈர்ப்பு போராட்டங்களை, திருநர் போராட்டங்களோடு இணைத்தே செய்தோம் என்றால் நிச்சயம் “கே” “லெஸ்பியன்” என்ற வார்த்தைகளுக்கான தனித்துவத்தை நாமே அழித்துவிடும் சூழ்நிலை உருவாகிடும்.... இதை குற்றச்சாட்டாக தயவுசெய்து பார்க்காதிங்க, ஒரு கோரிக்கையாக பாருங்க....

இப்போ இருக்குற நிலைமை, இதே நிலை தொடர்ந்தால் இன்னும் மோசமாகிடும் என்கிற ஒரு பயத்தால்தான் இவ்வளவும் சொல்கிறேன்.... நல்ல விஷயங்களை பாராட்டும்போது ஏற்றுக்கொள்கிற எம் சமூகத்து அமைப்புகள், இதையும் நல்ல விதத்தில் எடுத்துக்கொள்வார்கள் என்று நம்புறேன்..... இனிவரும் காலம் நம் தனித்துவம் நிலைபெறும் காலமாக ஆகவேண்டும் என்ற எதிர்பார்ப்பில் காத்திருப்போம்!!!...